— 58 —
Entjim itoe mendjadi sedikit slempang lantaran memikir njang HOK OEN brengkali ada demdem sakit hati berhoeboeng dengen papanja ampoenja oeroesan resia sendiri, tetapi roepanja HOK OEN njang keliatannja terboeka, menjingkirken semoea doegahan njang djelek en begitoe lah soedaranja njonja LOAN KIE sekarang lagi mendengerin HOK OEN poenja tjerita.
Mendenger teliti ada perloe, kerna HOK OEN menjeritahken njang ia panggil resia itoe, sampe moekanja mera-mera dan napasnja tertahan-tahan.
Baroe sadja tjeritanja HOK OEN sampe di achirnja, apa maoe iboenja entjek LOAN KIE, njang roepanja asem sadja, kloear en mengambil tempat di deket HOK OEN berdiri.
„Djoega sama itoe oewa akoe minta kau djangan tjeritahken,“ bisikin HOK OEN itoe prempoean, pada siapa baroesan ia pertjajahken resianja.
„Tida, djangan takoet dah,“ menjaoet njang di bisikin itoe dengen mesem.
Iboenja entjek LOAN KIE ada satoe di antara kaoem prempoean, njang mempoenjai hati mengiri. Ia slaloe tiroe apa sadja njang ia rasa bisa di kerdjahken. Seringkali ia pindjem badjoe atawa laen-laen boeat tjonto njang kebanjakan ia LOEPA poelangin lagi.
Begitoelah djoega, setempo ia liat pakeannja HOK OEN ada begitoe rapi ia panggil anak itoe en tanja siapa njang djaitin badjoenja.
Selainnja dari HOK OEN dan doea prempoean poen ada njang doedoek en berdiri bebrapa dari
