— 65 —
Dengen bersoeit-soeit en menjanji HOK OEN pergi ke blakang.
Olehkerna sorenja oedjan belon sadja maoe brenti, maka lah ENG TJAIJ tida taoe laen djalan boeat menjenangken tetamoenja dari pada kasi liat keadahan roemanja.
Boeat djalan di dalem satoe roema njang boleh di bilang besar djoega en sedikit orangnja, dan apalagi di harian begitoe mendoeng srenta oedjan, tida banjak sedikit poen moesti membagi pemandangan njang serem. Ini lah poen ada sedemikian, seoepama anak-anak tida ikoet.
HOK OEN en soedaranja djalan brendeng en banting-banting kakinja srenta mengomong sama soearanja njang di bikin-bikin, sampe di itoe roema njang memang sepi dan sedikit prabotannja terdenger njata sekali sesoeatoe gêma (soeara berbalik).
„Ini akoe poenja raudjang”, menjatahken HOK OEN; „en ini akoe poenja tempat mandi,” berkata GOAN OEN.
„Tetapi ini apa?” menanja satoe tetamoe njang ambil satoe tempat lisong tertaboer mas dari medja.
Satoe treakan adalah djawaban njang satoe-satoenja.
Ampir sadja lantaran kaget tempat lisong itoe di bikin djato; dengen tjepet ENG TJAIJ berbalik en meliat HOK OEN lari sama itoe tempat roko di tangannja.
„Ada apa?” menanja ENG TJAIJ,
