— 78 —
persakitan dan hakim HOK OEN lagi menoenggoe satoe tegoran dari boedjangnja. ISAH lantas sadja ngegrendeng. HOK OEN tida mengarti itoe, tetapi ia taoe njang adenja moesti ada sakit kras setelah ia ada lantarannja. ISAH kaloe boleh, kepengen mentreak stenga langit, kerna GOAN OEN baroe sadja maoe poeles, soeda mendoesin lagi lantaran mendenger soeara orang ketok-ketok pintoe. ISAH njang tida tahan mendongkolnja lantes sadja kloear en deminin HOK OEN bengong sadja dengen kembang di tangannja. HOK OEN bengong sebetoelnja lagi memikirin en kepengen taoe apa artinja bergrendengnja si ISAH. Roepanja kliatan goerem en plahan sekali ia berlaloe dari kamar. ISAH masoek poela, koentji pintoe, dan HOK OEN.... rasanja piloe boeat moest berdiam sendirian.
„GOAN OEN sakitnja begitoe keras, sampe dokter mendjadi slempang?" berkata ia seorang diri. Itoelah ada pertanjahan permoela njang ia bikin boeat dirinja sendiri. Seperti patoeng ia berdiri sekarang. Kadang-kadang ia intip dari lobang koentji agar mendapet taoe, apa djoega di dalem kamar telah kedjadian en tempo-tempo ia tidoer di bawa pintoe itoe boeat bisa mendenger apa djoega njang lagi sedeng di bitjarahken.
Itoe kesepian di dalem, njang melengken kadang-kadang di pademken oleh soeara bisikan, membikin HOK OEN berkwatir dan hatinja mendjadi memoekoel kras.
Ah, djika ia boleh masoek sementaran sadja, boeat meliat adenja en menjaksiken pegimana
