— 85 —
atawa sana sembari menarik napas dan kloearin perkatahan seperti: „Ah kita ampoenja kesel soenggoe ada terlebi brat dari pada kita sanggoep pikoelnja,” en dan di manatah sebetoelnja adanja Allah njang slaloe kita rasahken ada deket pada kita, di manatah semboeni Toean njang Berkwasa itoe. O, soekoerlah djoega njang itoe semoea tjoema ada prangsahan sadja en tida dengen sewadjarnja.
Tetapi apatah sebetoelnja moesti di goenaken boeat HOK OEN njang sekarang berada di lobang kedoekahan njang dalem? Ah, kita memang tida taoe, tetapi Allah sampe mengarti. Itoe hati njang ketjil terboeka boeat Allah, en Allah taoe njang di hari besoknja semoea kedoekahan nanti koerangan en Hoк OEN tjoema boeat sementaran waktoe sadja perloe sama pengiboeran.
Srenta meliatin dengen kasian pada anak stenga piatoe itoe, Allah bawaken penawar njang satoe-satoenja, jaitoe tempelin seroepa obat di matanja HOK OEN, mengasi ia kasantausan (± mengaso) sampe waktoe kesel en mengoetjoer aer mata telah berlaloe zonder kataoean lagi.
Kira-kira satoe djem kemoedian satoe di antara boedjang ketemoeken madjikan ketjilnja lagi tidoer sadja di kamar itoe njang glap en pondong padanja zonder di bangoenin lagi ke tempat tidoer.
