— 99 —
Bagian XII.
Hari ada terang, betoel bagoes sekali boeat harian motong padi, setempo ENG TJAIJ sama kedoea anaknja djalan-djalan ke penggilingan boeat meliat bekerdjanja masin njang ia baroe bli. Sorenja ENG TJAIJ moesti ke kota lagi, tetapi boeat pengabisan kali, kerna tokonja ia soeda soeroe oeroes oleh satoe kwasa en begitoelah ia djandji boeat kegirangan anak-anaknja, njang kapan ia balik, ia tida bakalan tinggal-tinggal padanja lagi en di laen minggoe nanti kasi pesta di penggilingan.
Padi semoeanja mengasi liat roepanja njang djeli. Masin njang di djalanin oleh satoe toekang tjoeke, bekerdjanja baek en dari semoea djoeroesan kloear padi njang soeda mendjadi bras. Sembari mendjerit lantaran kegirangan HOK OEN lompat-lompat dan menjelak sama tengah dari orang-orang njang bekerdja, godahken padanja satoe persatoe en kemoedian, boeat kekwatiran papanja, tjoba palé palé masin njang lagi sedeng terpoeter. ENG TJAIJ lantes sadja bopong anaknja dari tempat masin en pesen pada njang dijaga boeat liat anak-anaknja soepaia djangan satoe njang deketin itoe pekakas masin. Djem berdjalannja tjepet sekali, kerna setempo ENG TJAIJ tjaboet aer lodjinja, ia liat njang soeda temponja aken brangkat ke Station; tetapi anak-anaknja kliatannja begitoe bergirang sekali, sampe ia
