ORANG PREMPOEAN HAROES TAOE
(1) Boeah pikiran jang soetjie.
Berlaki bini ada satoe pokok jang terbesar dari segala makloek poenja koewadjiban. Boeat kitaorang menoesia, jang mendjadiken satoe roemah, satoe negeri dan satoe golongan. Satoe roemah tangga poenja kesoeboeran, satoe negeri atawa bangsa poenja kemoeliahan dan sebaliknja, semoewa ada tergantoeng sama perkara ini. Maka dari itoe, itoe pikoelan jang ada diatas poendaknja soewami istri soenggoe besar dan berat sekali, maka tjara begimanatah boewat menjampeken kewadjibannja itoe? Tiada laen lagi melaenken bikin soeboer anak tjoetjoenja, soepaja beroentoen roentoen tiada kapoetoesan, soepaja gaga waras tiada koerang soeatoe apa dan soepaja hidoep beroentoeng selama-lamanja. Dengen begitoe baroelah anak negerinja mendjadi koewat, dan anak negri koewat baroelah negrinja djoega mendjadi djaja.
Segala apa dalem ini doenia ada pokoknja. Menahoein pokok dengen tinggal merajap tjari boentoetnja, saolah olah orang tinggalken kajoe
