— 263 —
baek-baek. Kita poenja perkara ada perkara gelap, kataoehan ini sakali, salama-lamanja djadi engga oeroes!"
„Engga, ini sakali loe djangan takoet. Kaloe sampe djadi kataoehan, apa goea djoega engga bakal djadi tjilaka? — loe pikir begitoe adja. Goea tahan loe boekan apa: gini hari di sini masi banjak orang jang moendar-mandir, kaloe orang liat loe kaloear dari sini, nanti djadi banjak moeloet, laennja si goea engga salempangin."
„I ja, salahnja goea soeda engga bisa bangoen gelap-gelap, orang samalem si! — sampe poekoel tiga liwat goea baroe dapet poeles."
„Goea djoega begitoe."
„Kaloe engga, sekarang soeda oeroes-oeroes."
„Soeda, boeat apa loe pikirin! Samentar abis makan tengari, kaloe orang di Ioear soeda sepi, loe lantas boleh pergi, lantas engga maoe dateng-dateng keh!"
Sambil kata begitoe Soan-nio bermesem. Sasoeda berdiam sabentaran laloe ia menanja lagi dengen koenjoeng-koenjoeng :
„Eh, Ban-tjoan, ini hari kan memangnja loe engga masoek kerdja?"
„Kapan Tjengbeng."
„Ja, loe toh kerdja sama orang Blanda."
„Biar begitoe djoega, Tjengbeng samoeanja dapet brenti."
