— 272 —
soeda salesapken djoega segala pakean dan sapatoe jang boleh mendjadi tanda, satelah itoe laloe ia memboekah pintoe.
Kek-soen poenja mara di itoe masa boleh dibilang soeda naek betoel-betoel sampe di otaknja. Seperti klakoeannja matjan ia preksahi kaädahan dalem itoe kamar, dan sigra djoega ia dapetken ada orang jang mendekam di kolong randjang.
„Bangsat! betoel-betoel sadja loe simpan kendak! Siapa itoe?! Lekas kaloear, kaloe engga maoe, goea hantem sama tapalan pintoe!"
Ban-tjoan kaloear dengen melosoh, dan koetika Kek-soen dapet kenalin pada anaknja, ia poenja mata lantas mendelik tida terkira, tapi tida soeatoe perkatahan bisa kaloear dari moeloetnja. Ia poenja bibir beradoeh satoe dengen laen lantaran amara, dan sasoeda berselang sedikit lama laloe ia berseroe dengen soeara gemeteran:
„Bangsat! bangsat!!"
Ban-tjoan kakroepoekan tida kapoegoehan, mentjari ia poenja pakean. Samantara itoe sang ajah soeda ambil tapalan pintoe dan dengen sahabisnja tenaga laloe mengembat bebokong anaknja, jang sedeng membentoek pakeh sapatoe.
Kekasihnja Soan-nio lantas melingkoeh bahna merasa terlaloe sakit, tapi djoestroe itoe pentoengan jang membikin ia dari takoet sampe djadi brani.
