— 274 —
„Bangsat! anak jauwsioe!" berseroe lagi Kek-soen, jang koetika itoe daranja soeda djadi naek sampe di mata. „Salah-salah goea nanti habisin loe poenja djiwa! Loe hidoep djoega engga goenanja!"
Kamoedian laloe ia tersangah-sangah ambil golok kajoe jang ada di kolong dapoer, tapi sabelon ia bisa goenaken itoe boeat berhantem pada anaknja, Djamea, jang djadi sanget katakoetan, lantas berkoetet-koetetan pegangin ia poenja tangan, seraja kaloearken berbagi-bagi perkatahan meratab.
„Betoelnja kaloe si toewa-bangka boleh, kanapa orang jang moeda engga boleh?“ kata poelah Ban-tjoan, kamoedian sigra ia melariken diri dari pintoe depan, meninggalken ajahnja jang sedeng kalap.
Dalem peroetnja Kek-soen, sadari tadi memang soeda bertimboen amat banjak napsoe amara, hingga sekarang ini soeda djadi padat betoel-betoel lantaran diemposin lagi oleh Ban tjoan poenja perkatahan jang sanget pedes. Soeda demikian, dengen mendadak ito oewap ratjoen kenah terbendoeng oleh rasa penasaran, dari sebab sang anak soeda melariken diri. Djadi sabelon bergoelaknja sang napsoe dapet dilampiasken soeda tertambah lagi dengen soeatoe djenis amat heibat jang menindih dari atas, itoelah membikin Kek-soen tida sanggoep menanggoeng, hingga sahabisnja kaloearken satoe soeara treak jang seperti goemoeroenja goentoer, lantas ia roeboeh ka tanah dan djato pangsan.
