— 140 —
pangkat, itoelah ada dari lantaran mengandel pada pengaroe soedara toeanja jang benama Jo Tjian jang di kota Radja ada djadi kawannja dorna.
Dengen pertoeloengannja itoe soedara djoega, maka Jo Giam diangkat djadi Thaisioe di kota Tengtjioe, boeat mengoeroes dan berkoeasa di seantero itoe tempat jang berdamping dengen laoetan.
Ini kota ada socatoe tempat jang rame. Banjak sekali soedagar-soedagar dari laen tempat dateng berniaga. Soepaja ini tempat bisa djadi santausa. Jo Giam dikasi koeasa dalem oeroesan balatentara. Tapi ia sendiri tida poenja kapandean dalem hal mengatoer soldadoe, maka kabetoelan sekali ia dapet Loan Teng-giok, jang boleh diandeli dalem perkara demikian, dan dipakerdjaken boeat bagian militair.
Demikianlah waktoe itoe Tothongtjie dateng, Jo Giam laloe kasi taoe satoe persatoe atas pengadoeannja itoe pahlawan jang baroesan. Dengen terangken djoega, bahoewa orang jang melakoeken itoe kadjahatan telah dikenali satoe antaranja ada Soen Sin, madjikan dari waroeng arak Sipliephaij.
,,Dia itoe moesti ditangkep," kata Jo Giam sabagi penoetoepnja.
,,Soen Sin?. Soen Sin ada tjampoer dalem itoe kadjahatan, membakar dan memboenoe?" kata Loan Teng-giok dengen roepa terkedjoet.
,,Ja, mengapatah Thongtjie djadi kaget?" tanja itoe Thaijsioe.
