— 164 —
djaoe: „Soen Liep itoe ada diseboet djoega Peng Oet Tie, itoe gelaran orang briken lantaran ia poenja kagagahan. — Dan maski sekarang ia soeda ada dalem pendjara, toch akoe masi koeatir ia bisa melarikan diri. Lantaran itoe maka akoe pikir, berhoeboeng dengen kaoe poenja berangkat ka Tengtjioe, akoe maoe serahken padamoe tigaratoes soldadoe boeat bantoe djaga itoe kota. Besok pagi akoe nanti briken itoe Lengtjiam bersama satoe soerat katerangan boeat dioendjoeki pada Jo Thaijsioe. Begitoelah adanja akoe poenja kainginan, harep kaoe tida menoelak, ja?”
Kaloe iloe waktoe orang kasiken salaksa tail mas, brangkali Houw Seng tida djadi begitoe girang, sabagi denger ini permintahan dari Loan Teng giok. Maka tentoe sadja ia lantas trima itoe tawaran dengen tida menampik lagi. Tapi kagirangan jang ada dalem hati, ia tida oendjoek bogitoe njata.
Kamoedian Loan Teng-giok kata: sasoedanja mendapet itoe katerangan-katerangan jang baroesan, boleh diharep jang lagi doea hari sarangnja Tjo Loen bisa disapoe bersi. Dan kaloe Tenghoensan soeda dibasmi, boeat pertoeloengan jang sekarang Houw Seng lakoeken, sapoelangnja dari sini ia tida loepa boeat mintaken satoe pangkat pada pemerenta agoeng.
„Oh. boeat ini pakerdjahan ketjil, jang tida sabrapa mengaloearken tenaga, masalah akoe ada harep mendapet apa-apa dari Hianheng,” kata
