— 198 —
Thian Heng Too", artinja: ,,Bantoe mendjalanken atoerannja Allah".
Djoega tjari ramsoem boeat persadiahan, bikin alat sendjata dan koempoelin koeda-koeda boeat digoenaken dalem waktoe perang. Di sana sini tempel soerat plakaat atawa siarken omongan pada anak negri, soepaja orang soeka masoek djadi soldadoe. Tegesnja tida ada satoe apa jang tidak di-ichtiarken.
Sabelonnja liwat doea boelan, di Tenghoensan soeda berkoempoel doeariboe tentara baroe, jang satiap hari dengen radjin diadjar baris dan maen perang-perangan. Djoega sendjata soeda sadia hingga kamadjoean itoe samangkin hari kaliatan bertamba.
Pada soeatoe hari di roewangan Tjigiethia dibikin pembitjarahan boeat mengadakan ramsoem jang menoeroet katanja Loan Teng-giok, maski sekarang ramsoem ada sadia, tapi belon tjoekoep betoel, maka perloe moesti ditamba lagi.
Tapi boeat dapetken ini barang atawa oewang, dilarang boeat merampas kapoenjahannja orang baek-baek. Merampok poen boleh, tapi moesti liat pada orangnja. Kaloe itoe ada harta bandanja orang-orang hartawan jang djahat, atawa pembesar-pembesar jang rakoes dan soeka menjoesaken pada anak negri, boekan sadja miliknja itoe haroes dirampas, tapi djiwanja poen dibinasaken, sabagi membales sakit hatinja orang ketjil jang telah dianiaya.
