— 199 —
Baroe sadja itoe pembitjarahan selesih, satoe liauwlo dateng mewartaken: bahoewa di bawah goenoeng ada kaliaran ada bebrapa orang jang lagi sedeng liwat dengen membawa barang-barang ampat lima pikoel banjaknya.
,,Itoelah bagoes sekali!” kata Siauw-tjhit sambil melompat bangoen dan minta perkenan boeat kaloear mamegat orang jang djalan itoe.
Teng-giok loeloesken itoe permoehoenan dan laloe titahken Soen Sin boeat ikoet sama-sama.
,,Inget, soedara,” kata Loan Teng-giok dengen soeara mamesen: ,,kaloe jang liwat itoe ada soedagar jang berkapitaal ketjil, lepasken sadja padanja dan djangan diganggoe, kerna marika poen maoe tjari oentoeng boeat mamelihara anak istrinja."
Itoe doea Hohan memanggoet dan lantas berlaloe. Kamoedian adjak limapoeloe liauwlo aken toeroen goenoeng.
Sasampenja di bawah goenoeng, betoel sadja Siauw-tjhit liat itoe ampat atawa lima orang jang memikoel barang, soeda liwat sedikit djaoe; sedeng di sebla blakang ada kaliatan saorang gaga jang mengiringken, dengen djalan sambil bertoendoek, roepanja saperti orang berpikir.
Orang jang mengiring itoe, kendati pakeannja tida bagoes, tapi toch sikepnja kaliatan kosen. Badannja kekar dan pengawakannja boelet seperti matjan. Djalannja begitoe tetep dan mamegang
