— 203 —
tjaraken laen-laen: dan lagi sedikit hari, kitaorang berame poen maoe oendang Lie Eng Koko dateng berkoempoel, bocat, menambaken kakoeatannja goenoeng Tenghoensan.”
„Benerlah sabagimana jang Sianw-tjhit Ko telah bilang,” menjamboeng Tjo Loen dan Soen Sin dengen soeara berbareng: belon taoe bagimana Touwheng poenja pikiran; soedikah meloeloesken kita-orang poenja permintahan?”
„Sasoenggoenja akoe haroes hatoerken banjak trima kasi atas soedara-soedara di sini poenja katjintahan,” saoet Touw Hin: „tapi lantaran tanggoengan-tanggoengan jang berat di atas badan, maka salaennja akoe, Tongdjin djoega ada niat boeat pisaken diri dari oeroesan negri.”
Jang laen-laen bantoe memboedjoek soepaja Touw Hin soeka toeroet boeat tinggal sama-sama di ini goenoeng. Tapi lantaran orang jang diboedjoek tetep menampik, maka hal itoe tida dibitjaraken lebi djaoe.
Achirnja Soen Sin kata: kaloe sampe ada kaperloean jang begitoe sanget, tida bisa trima soedara-soedaranja poenja permintahan, marika poen tida brani memaksa. Tapi ia harep Touw Hin soeka menginep sadja di ini goenoeng boeat bebrapa malem lamanja.
„Soenggoe meniesel sekali, Soenheng, jang boeat ini permintahan djoega akoe tida bisa loeloesken seanteronja,” kata Touw Hin: kerna kaperloean ada memaksa boeat akoe berdjalan
