— 207 —
dan peritoengan jang lagi diberesken. Paling laat sapoeloe hari semoeanja nanti selesih.
Maski kapingin bisa dioeroes dengen tjepet, toch Touw Hin terpaksa moesti trima baek atas permintahannja itoe langganan. Sasoedanja tida ada apa-apa lagi jang perloe dibitjaraken, ia laloe pamitan dan balik kombali ka hotel tempatnja menginep.
Pada itoe kawan-kawan jang mengikoet, Touw Hin soeroe poelang sadja doeloean ka Santong, kerna ia masi ada mempoenjai oeroesan, maka tida bisa lantas berangkat sekarang djoega. Itoe kawan toeroet prentanja dan lantas berangkat tida lama kamoedian.
Sasoedanja berada sendirian di dalem kamar, Touw Hin laloe ambil itoe soerat bersama oewang jang Soen Liep kirim boeat disampeken pada Gak Ho. Kerna taoe jang itoe orang ada bekerdja di gedongnja Ong Hoema, maka tida soesa boeat ia tjari.
Sigra djoega ia telah sampe ka itoe tempat jang dikoendjoengi. Tapi di depan gedong ada sepi, tida kaliatan satoe manoesia jang boeat ditanja. Salagi merasa kesel, dari djoeroesan waroeng thee ada mendatengi saorang lelaki, jang maoe masoek ka itoe gedong.
Touw Hin lantas dapet doega, bahoewa ini orang tentoe ada bekerdja pada Ong Hoema, maka kaloe ia tanja tentang Gak Ho, tentoe ini orang bisa kasi katerangan.
