— 223 —
Ia merasa rindoe !......... Tapi sama siapa ? Ia merasa tjinta !............ Tapi siapatah jang ditjintaken ? Boekan soeaminja, hanja orang-orang moeda jang ada dalem ingetannja.
Tjoba kaloe dalem itoe gedong ada banjak pake penggawe moeda, brangkali lebi siang Giok-go soeda terdjeroemoes ka dalem perdjalanan tersesat, lantaran menoeroeti perasahan hati jang ia soeda tida bisa kemoediken lagi. Tapi beroentoenglah lelaki itoe ada, maka sabegitoe lama ia masi ternama bersi.
Tapi blakangan satelah meliat soeaminja pakerdjaken Touw Hin dalem itoe gedong, hatinja djadi girang dan api birahi poen berkobar lagi. Betoel Touw Hin tida terlaloe tjakep, tapi badannja jang tegap dan roepanja jang gaga, ada lebi menang sapoeloe kali dari ia poenja soeami jang soeda lojoh.
Tambahan Touw Hin ada saorang jang manis boedi dan sagala pembitjaraan-pembitjaraannja ada meresepken hati, hingga Giok-go djadi katarik betoel. Inilah ia rasa ada waktoe jang baek boeat bikin perhoeboengan rasia, kerna Lie Kwa-eng satiap hari kaloe siang ada di kantoer, maka apa jang diperboeat tentoe tida kataoean.
Pada soeatoe hari, waktoe Touw Hin lakoeken pakerdjaannja sabagimana biasa, Giok-go ada kaloearken perkatahan memaen: tapi Touw Hin tjoema djawab sadja sabiasa, dan sekali-kali ia tida doega kaloe ini njonja telah djato hati padanja.
