— 235 —
apa hadjatnja itoe tetamoe. Tapi ini orang moeda laloe kaloearken salembar kaartjis boeat disampeken pada Lie Kwa-eng. Sebab begitoelah memang biasanja, kaloe orang maoe bertemoe pada pembesar, lebi doeloe moesti kasi kaartjis nama, dan Touw Hin poen ada orangnja itoe pembesar jang bekerdja di kantoor terseboet.
Djadi itoe tetamoe. boekan maoe katemoeken Touw Hin.
Touw Hin trima itoe dan laloe bawa pada pembesarnja, jang tatkala itoe soeda poelang dan berada di gedong.
Kwa-eng satelah liat itoe nama, lantas prenta Touw Hin silaken tetamoe itoe masoek, dengen berkata:
„Dia itoe ada akoe poenja Siauwtit jang baroe dateng dari kota Radja.”
Selang sedikit waktoe Touw Hin soeda anterken tetamoe itoe ka roewangan gedong tempat dimana Lie Kwa-eng ada doedoek menenggoe. Orang moeda itoe sabetoelnja ada poetranja Pang Phioe jang bernama Pang Pek-hoa, satelah katemoe pada Lie Kwa-eng, ia laloe membri hormat dan toean roema laloe silaken doedoek.
Tapi Pek-hoa djalanken doeloe atoeran adat istiadat sabagimana pantesnja kaloe bertemoe pada familie jang toea, ia berloetoet sambil berkata:
„Lama sekali Siauwtit soeda berpisa pada Lopehoe. Dan harep dalem itoe sepandjang waktoe Lopeh ada di dalem kaslamatan dan beroentoeng.”
