— 273 —
„Maski perboeatan jang dilakoeken oleh istrikoe, akoe belon menjaksiken sendiri,“ kata Kwa-eng dalem hati: „toeh akoe maoe pertjaja kabenerannja Touw Hin poenja pengadoean, sebab dari kalakoeannja pada Pek-hoa ada kaliatan laen sekali dari biasanja.“
„Tapi hal ini akoe tida boleh riboet-riboet,“ kata poela ia: „kerna dengen begitoe, akoe sendiri boleh mendapet maloe. Hanja ada lebi baek kaloe akoe berlakoe dengan aloes dari soeroe ia poelang sadja.“
Sasoedanja tetep itoe pikiran, pada waktoe orang doedoek santap tengahari, dimana ada toeroet djoega Giok-go bersama-sama Pek-hoa, si kolot laloe berkata sambil tertawa.
„Siauwtit di sini soeda lama djoega, sasoenggoenja akoe merasa girang dan hatoerken trima kasi atas kaoe poenja katjintahan boeat tengok akoe poenja kawarasan dan temeni kita-orang. Tapi dengen kaoe poenja berdiam di sini begini lama, akoe koeatir ajahmoe di kota Radja djadi boeat pikiran.“
„Ah itoelah tida djadi apa,“ saoet Pang Pek-hoa: „kerna datengkoe ka mari poen memang atas pekenannja. Djoega lebi doeloe akoe soeda kasi taoe, bahoewa akoe bakal tinggal di sini bebrapa boelan lamanja.“
„Kendati begitoe apa ia tida djadi berkoeatir?“ kata poela Kwa-eng sambil bersenjoem.
„Berkoeatir apatah Lopehoe?“
