— 279 —
Aehir-aehir ia denger Pek-hoa lagi kasi taoe niatnja boeat singkiri dirinja dari ini doenia, soepaja itoe tjoetjoe djahanam boleh bersoeka-soeka dengen laloewasa pada istrinja jang masi moeda. Sabenernja banjak lagi laen-laen perkatahan ia telah denger, tapi itoe semoa soeda tida kaingetan lagi dan dengen sanget goesar ia laloe menghamperi dan tendang daonnja pintoe, sambil berkata:
„Oh, djahanam!......... doerdjana!......... baroe sekarang akoe dapet pergoki perboeatanmoe!“
Sambil berkata begitoe ia menjerang masoek.
Giog-go bangoen dari pangkoeannja Pek-hoa dengen kaget, sedeng katjintahannja poen djadi terkedjoet boekannja maen, hingga sakean lama ia mengawasi seperti orang kasima.
„Kaloe begitoe njatalah bener perkatahannja Touw Hin,“ kata poela Lie Kwa-eng: „dan kaoe prampoean doerdjana!, kaloe begitoe soeda minta soepaja akoe menghoekoem Touw Hin jang satia, soepaja kaoe boleh laloewasa lakoeken ini perboeatan boesoek dan kedji!“
