— 283 —
na sambil berpikir: „bagimana kaoe pikir? apa tida baek kita koeboer sadja diam-diam sabentar malem?“
„Oh, itoelah tida boleh. Maski hal itoe bisa dilakoeken, toch kaloe orang tida dapet liat ini pembesar dalem bebrapa hari, tentoe laen-laen pembesar dateng preksa dan tanjaken ka mana perginja. Itoelah tida baek.“
„Tapi bagimana abis?“
Pek-hoa berdiam, Giok-go djoega tida berkata-kata.
Liwat satenga djam itoe istri jang tjilaka dapet satoe pikiran bagoes, sembari bersenjoem ia laloe basiki apa-apa di koepingnja itoe katjintahan. Pek-hoa djadi girang dan soeka hati. Sigra djoega doea orang ini bersiken itoe kamar sagala tanda-tanda dari bekas berklai. Perabotan jang terpental poen dibetoelin lagi ka tempatnja. Sasoeda itoe, marika laloe gotong maitnja Lie Kwa-eng ka atas randjang dan Pek-hoa balik ka kamarnja sendiri sambil mamegang boekoe.
Itoe waktoe Giok-go lantas berlari-lari ka loear sambil bertreak-treak minta toeloeng, katanja ia poenja soeami dapet sakit kesamper.
Boedjang-boedjang jang denger itoe treakan djadi riboet dan boeroe-boeroe dateng menghamperi, sedang Pak-hoa djoega lantas berlari-lari sambil memegang boekoe, seperti orang jang bener-bener selagi membatja boekoe djadi kaget dengen itoe soeara treak.
