— 313 —
itoe perboeatan ia djadi menghinaken sanget padakoe."
Satelah denger itoe katerangan, Jo Liem djadi mendongkol. Ia laloe berpaling pada itoe orang sembari kepal tangan dan berkata:
„Oh itoelah tida patoet sekali! Bagimana kaoe bisa menoedoeh orang dengen begitoe memboeta, hingga membikin orang djadi maloe ? — Kaoe taoe, Itkihoea ada akoe poenja sobat, jang sabegitoe lama akoe kenal padanja, ia ada saorang jang berhati poeti bersi. Apa ini katerangan kaoe maoe pertjaja atawa tida, itoelah ada perkaramoe sendiri. Tapi kaloe kaoe masi tetep membikin orang poenja maloe, maka hati-hatilah dengen akoe poenja kepelan jang tida bisa liat perkara tida patoet!”
„Akoe djoega tida menoedoe padanja,” saoet itoe orang dengen soeara pelahan: „hanja akoe tjoema menanja, kaloe-kaloe ia taoe tentang ilangnja barangkoe itoe. Maka apa tida pantes kaloe akoe tanja padanja, kerna ia poen ada bersama-sama dan brangkali ada liat orang jang mentjoeri itoe? Tapi ia boekan saoeti dengen baek, hanja lantas maoe poekoel padakoe,dan tentoe djoega akoe soeda dipoekoel kaloe tida ada orang banjak jang menghalanken.”
„Nah kaloe begitoe, soedalah,”" kata Touw Hin, jang rasa itoe oeroesan ketjil djangan dibikin lebi pandjang. Jo Liem djoega kata begitoe, maka achirnja itoe pertjidrahan djadi dami dan orang banjak jang bergeroemoelan lantas pada boebar.
