— 315 —
„Benerlah,” begitoe Jo Liem samboeng bitjaranja Touw Hin: „lebi baek begitoe, dari pada bekerdja jang tida ada katentoeannja.”
Tapi kaoe berdoea, satoe pada laen telah bertemoe di manatah, dan ada oeroesan apa dateng ka mari?” tanja Tjoa leng: „tjobalah tjeritaken kerna kaoe poen belon tjeritaken itoe padakoe.”
„Oh, akoe poenja riwajat ada amat pandjang boeat ditoetoerken,” saoet Touw Hin: „tapi biarlah akoe toetoerken dengen ringkes, soepaja kaoe bisa taoe sebab-sebabnja jang bener dari bermoela sampe di achirnja.”
Sahabisnja kata begitoe, Touw Hin laloe tjeritaken bagimana ia telah disoeroe bawa barang dagangan oleh Tongdjin Lie Eng ka kota Radja, dan di tenga djalan soeda katemoe Soen Liep jang mengirim soerat boeat disampeken pada Gak Ho; kamoedian bagimana lantaran itoe soerat ia ditangkep dan dihoekoem boewang.
Lebi djaoe ia tjeritaken kabaekannja Lie Kwa-eng jang djadi pembesar dan berkoeasa atas dirinja. Sampe achirnja ia dapet taoe perboeatannja Giok-go pada Pang Pek-hoa. Dan boeat bales boedinja itoe orang jang telah mengoeroeki kabaekan dan boedi, ia soeda berdami pada Jo Liem dan Pwe Soan aken boenoe itoe sapasang manoesia boesoek di tenga djalan.
Satoe persatoe ia tjeritaken dengen terang.
„Nah, lantaran itoelah sebabnja,” kata Touw Hin: „akoe djadi koeatir jang Koko Lie Eng nanti
