— 346 —
lawanannja ada mempoenjai kesaktian jang lebi tinggi dari peladjarannja.
Blakanganan ia telah kaloearken djoega djimat genta dan hikmad papan lengpay, dengen maksoed boeat binasaken itoe tandingan. Tapi satelah itoe doea barang wasiat djoega kena dipoenaken, ia tida mempoenjai laen barang wasiat boeat teroesken itoe pertandingan. Ada djampe-djampe laen, seperti panggil angin dan oedjan, tapi itoe lagi ilmoe ketjil, tentoe tida bergoena, sedeng ilmoe jang tinggi ia soeda keloearken, tida menoeloeng.
Begitoelah ia berpikir sambil bengong. Dan achirnja sebab merasa tida bisa lawan lebi lama, ia rasa lebi baek berlaloe sadja, soepaja tida dapet maloe lebi besar.
Baroe sadja ia maoe angkat kaki, Hoensi Maong lantas berseroe:
„Siantiang maoe ka manatah? —Ah, doedoeklah doeloe sabentaran, liat Pintjeng poenja sedikit permaenan soengkap, jang sadari tadi belon pernah dipertoendjoeken. Boekantah Siangtiang poenja permaenan soeda dikasi orang liat, tapi mengapatah sedeng permaenan sendiri telah dikaloearken beroentoen-roentoen, orang laen poenja permaenan tida maoe diliat boeat tamba menjenangken hati?“
Kwe Keng poenja moeka jang koeroes dan poetjet djadi beroba mera, roepanja ia merasa djenga dengen itoe perkatahan.
Kwe Keng tida bisa menjaoet.
