— 363 —
perdjalanan toeh tida ada bermaksoed boeat dapetken moerid, boekan ?"
„Ja, maksoedkoe memang boekan begitoe,"
,,Nah kaloe begitoe, tetepkenlah apa jang diniat dan besok kita-orang boleh berangkat."
Begitoelah iaorang beromong-omong dan tida lama dateng boedak dateng bawaken makanan, dimana marika berdoea laloe doedoek santap dengen tida ditemenin oleh toean roema, sebab Lie Liang-sih sampe malem masi doedoek mengomong, jang roepa-roepanja ada dibitjaraken oeroesan penting.
Sahabisnja santap, kerna merasa tjape, maka doea sobat itoe lantas masoek ka dalem masing-masing poenja kamar dan djadi poeles tida lama kamoedian.
Dengen tinggalken doeloe Oan Swie bersama Tjoa leng jang lagi tidoer, baeklah kita pergi kaloear aken meliat pada Lie Liang-sih jang menjamboet tetamoenja.
Sasoedanja oetoesan itoe berdoedoek, Liang-sih laloe menanjaken apa hadjatnja.
,,Datengkoe ka mari ada atas prentanja Tong Djoebit," saoet itoe oetoesan: jang prenta akoe boeat menanja pada Tjoenkhwa, tentang keadahannja Kwe Keng Todjin?"
,,Menanjaken keaklahannja Kwe Keng Todjin ?" mengoelangi Liang-sih dengen hati terperanjat.
,,Bener," saoet itoe oetoesan sambil memanggoet.
