— 67 —
nan jang diminta. Kamoedian ia taro doea mangkok boeat djadi tempatnja arak.
,,Eh, apatah ini toean boekannja jang tadi dateng kamari dan soeda bersantap baroesan?" menanja itoe djongos pada Houw Seng: ,,dan begitoe tjepet toean soeda lapar lagi?"
,,Troesa perdoeli, apa akoe soeda dateng atawa belon," saoet Houw Seng:,,hajoe lekas bawa itoe arak jang tadi akoe minoem."
Djongos itoe memanggoet sambil berlaloe.
Tida lama ia dateng kombali dengen membawa arak bebrapa gendoel.
,,Hajoelah dahar, dan ini arak baek sekali," kata Houw Seng pada Siauw-tjhit: ,,sebab akoe tadi soeda makan, maka biarlah akoe temenin sadja pelahan-pelahan sambil bertjerita. — Dan ini daging enak, — empoek?"
Siauw-tjhit tida tampik lagi itoe tawaran, maka arak jang ada di gendoel ia lantas toewang ka mangkok, dan begitoe djoega mangkoknja Houw Seng. Kamoedian ia iroep, jang sekali sadja ampir djadi kering.
Maski itoe waktoe hatinja ini orang gaga lagi iboek memikiri iboenja, tapi toch makannja kaliatan bernapsoe. Sabentar-bentar ia minoem itoe arak dan makan dagingnja, hingga Houw Seng jang meliat memoedji dalem hati dari bagoesnja ini orang poenja makan.
