— 213 —
Lie Eng berkata lebi djaoe:
„Baginda Thaij-tjouw dengen sabatang golok soeda malang melintang di ini doenia, poekoel sana sini aken djadiken ampatratues lebi kota- kota besar dan ketjil, dengen dapet poenjaken Kangsan berlaksa li djaoenja, diriken karadjahan hingga toeroen menoeroen pada Liatseng (Keizer-keizer jang telah marhoem). Tapi satelah kadoedoekan itoe toeroen pada Keizer Wie-jong, jang sadari moelai bertachta telah angkat Thaysoe sabagi Soesiang, dengen membri kakoeasahan besar dalem oeroesan pamerentahan, kenapatah kota Piankeng jang doeloenja begitoe tegoe, djadi roeboeh dalem sesaat sadja ? Sedeng kadoea Keizer moesti alamken kamelaratan dan maloe jang amat besar, jang laen dari begitoe bilangan Lianghoo semoea terampas oleh moesoe, hingga rahajat negri menampak kasoesahan dan katjilakahan jang boekan ketjil. ― Dan siapatah sabenernja jang ampoenja sala ?“
Ampat dorna itoe tida bisa menjaoet. Satoe pada laen saling mengawasi dengen roepa tida mengarui. Boekantah marika dioendang ka mari ada boeat doedoek makan minoem dalem perdjamoean, mengapa sekarang dimadjoeken ini pertanjahan-pertanjahan jang begini aneh?
„Ka manatah toedjoeannja ini omongan ?“ menaja Tjoa Keng dalem hati, sedeng moloet tida
