— 326 —
katakoetan, begitoe djoega Lauw Bang-ko dijadi amat bingoeng, sebab kapal-kapal jang soeda rampoeng telah dirampas moesoe.
Dengen berempoek pada Mouw Khian, itoe pembesar kota lantas toelis soerat pada Ouw Oh-ma, boeat membri taoe atas kadatengannja Hohan dari Tenghoensan, jang soeda rampas itoe kapal-kapal.
Sekarang baeklah kita tinggalken doeloe keadahan di Tengtjioe dan mari mengikoeti djalannja itoe kapal-kapal, dimana Houw Seng, jang ada mengarti banjak dalem perdjalanan laoetan, lantas oendjoek djalan boeat menoedjoe ka Kimgo.
Perdjalanan itoe djadi menoedjoe ka djoeroesan Timoer-selatan.
Dalem itoe sapandjang djalan, semoea Hohan liwatken temponja dengen beromong-omong dan minoem. Koetika baroe belajar satoe hari lebi, orang masi bisa liat pemandangan. Tapi sasoeda kapal berdjalan ampir tiga hari, di sana sini orang tjoema liat sadja aer jang bersamboeng dengen langit.
Marika itoe telah sampe di laoetan jang besar.
Tapi sabegitoe djaoe belon terdjadi soeatoe apa. Kapal belajar teroes dengen ladjoe, jang roepa-roepanja ada dapet angin baek.
