— 51 —
dan Ong Hoe, tida perloe direwelken lebi djaoe, kerna marika ada seperti djoega tiada, malah memang lebi baek boeat rahajat, jang itoe tiga dorna tida ada di doenia.”
,,Tapi jang kami paling iboeki,” kala poela baginda: ,,jaitoe pasoekannja barisan Kim jang sampe di ini waktoe masi menjerang dengen sanget keras. Maka keng ada mempoenjai daja oepaja apalah boeat moendoerken moesoe?“
,,Bala bantoean jang dibawa prentanja Tjiong Soe-touw dan Tiauw Peng-tiong, sekarang soeda dateng dan ada berkoempoel di bawa kota," saoet Lie Kong: ,,maka sekarang baek toeankoe oendang itoe doea penglima boeat dikasi djabatan djendraal, jang tentoe orang-orang Kim tida sabrapa lama aken teroesir moendoer."
Keizer toeroet itoe advies dan laloe prenta Lie Kong pergi mengoendang, jang tida lama Tjiong Soe-touw dateng mengadep ka hadepan baginda.
Sasoeda djalanken peradatan sabagimana biasanja satoe mantri pada radjanja, baginda djadi girang waktoe meliat itoe panglima toea, jang kaliatannja masi gaga perkasa. Kamoedian baginda menanja:
,,Bagimana keng poenja pikiran boeat kasi moendoer moesoe, apa keng ada mempoenjai daja jang baek ?”
,,Menoeroet hamba poenja pengliatan,“ kata
