— 573 —
Tida lama kamoedian Tio Liang-si dan Ong Tiauw-in lantas dittadepken pada Sri Makota, jang djadi terkedjoet liat kadoea mantrinja ini.
Baginda Ko-tjong masi belon taoe kaloe ini doea mantri besar soeda hendak berhianat, dan djadi amat heran koetika liat padanja. Maka baginda lantas tanja pada Hoen-kang-liong, apa sebabnja doea orang ini ditangkep, sedeng kadoeanja ini ada mantri dari karadjahan Taysong.
„Oh, toeankoe roepanja belon taoe bagimana ini doea penghianat hendak anterken diri toeankoe pada moesoe,” kata Lie Tjhoen, jang lantas toetoerken satoe pertsatoe atas katerangan jang ia dapet.
Baginda djadi amat kaget dan goesar. Dorna ini jang taoe kasalahannja soeda terang, boekan sadja tida brani membanta atas toedoehannja Lie Tjhoen, hanja tida brani djoega angkat kapala aken memandang orang-orang jang berada dalem itoe roewangan.
Itoe waktoe Gak Ho dan Hoa Hong-tjoen, jang daoeloe hari pernah dianiaja oleh Ong Tiauw-in, lantas hamperi itoe pembesar, boeat soeroe kenali siapa adanja marika. Tapi kaparat itoe tida brani menengok, sedeng antero toeboehnja djadi bergoemeter.
Gak Ho laloe toetoerken di hadepan baginda, tjara bagimana Ong Tiauw-in soeda berlakoe pa
