— 575 —
poenja berangkat, sampe waktoenja, biarlah toeankoe soeka senangken hati dan djalan djalan di ini tempat. Bila dateng itoe hari, sin nanti sediaken penganter boeat iring baginda sampe ka itoe kota."
„Keng soeda oendjoek boedi dan pertoeloengan besar pada tim,” kata Baginda Ko-tjong: „maka pahala itoe ada besar seperti langit.”
Atas pertanjahannja baginda, hari apa jang telah dipili, Lie Tjhoen kasi taoe: tanggal tiga jang bakal dateng ada itoe hari baek jang telah ditetepken.
Baginda tida membanta, hanja menoenggoe sadja Sampe itoe waktoe. Boeat liwati tempo senggang, satiap hari Baginda Ko-tjong bitjaraken banjak perkara pada mantri-mantri civiel dan militair dari Kimgo.
Lie Tjhoen telah sediaken banjak barang-barang berharga boeat menganter pada baginda, seperti moeteara, poewalam, arak Hiang-swat-tjioe dan dagingnja ocler Pasih, tegesnja barang- barang jang langkah.
Koetika liat ini bingkisan jang begitoe banjak, baginda djadi heran dan tanja: apa di ini poelo ada begitoe banjak hasilnja, Lie Tjhoen kasi taoe, barang-barang ini boekan terdapet dari satoe poelo sadja, hanja dari sana dan sini. Lebi djaoe diterangken sasoeatoe barang itoe poenja asal kaloearan.
