— 582 —
Soelingkoe ilang, manatah soelingkoe jang doeloa, Hatikoe sakit, seperti terpoekoel dengen aloe.
Mendenger itoe soeara Jan Tjeng djadi terkedjoet, sebab ia kenali jang itoe ada soearanja Lie Soe-soe.
Dengen tida kaloearken satoe perkatahan ia balik ka djalanan tadi, dimana Tja Tjin dan jang laen laen lagi pandang kabagoesannja poehoen-pohoen boenga. Orang jang terseboet blakangan ini djadi amat heran, koetika liat Jan Tjeng tarik tangannja mengadjak poelang.
„Boelan begini terang, maoe apatah boeroe-boeroe poelang?” kata Tja Tjin dengen heran.
Jan Tjeng laloe kasi taoe, bahoewa di sebla depan ia denger soeara orang menjanji dan kenali siapa adanja soeara itoe. Tja Tjin tida bisa pertjaja, tapi waktoe Jan Tjeng soeroe pasang koeping dan njatalah soeara itoe ia kenali bener Lie Soe-soe adanja.
Sekarang marilah kita balik kombali sadja,“ kata Jan Tjeng, jang teroes tarik tangannja Tja Tjin dan Gak Ho, dengen tida kaloearken satoe perkatahan poela.
Koetika sampe di pondok, Houw-jan Tjiak djoega belon tidoer, hanja lagi maen bade-badean dengen bertaro minoem arak dengen Soen Liep. Doea orang ini tida perdoeliken datengnja itoe
