— 65 —
rahajat, jang laen-laen soeda tida boleh diharep.
Berpikir sampe di sini Peng-tiong laloe mengelah napas kombali.
„Sekarang keadahankoe soeda djadi begini roepa,“ kata poela Tiauw Peng-tiong dalem hati: „akoe tida ada moeka boeat balik kombali ka tempat sendiri, kerna itoe si toea bangka Tjiong Soe-touw kaloe dapet taoe jang akoe telah memblakangken padanja, pastilah ia katawain dan djengek-djengekin. Sabetoelnja kaloe ini hari akoe dapet kakalahan jang begini roepa, itoelah soeda terdjadi lantaran si kolot poenja lantaran.“
Kerna tida maoe dapet hinaän dari kawan sadjabatnja, dan maoe poelang tida ada moeka boeat katemoe orang, achirnja ia tjaboet golok, tentoe sadja degen maksoed boeat abisken sadja djiwa sendiri.
Tapi koenjoeng-koenjoeng ia dapet satoe pikiran, bahoewa orang idoep dalem doenia tida bedah sabagi mengimpi sadja. Itoe kamoeliahan dan kakajahan, pengaroe besar dan berpangkat, semoea ada sabagi awan, jang dalem sakedjeb bisa linjap dengen tida meninggal-ninggalken bekasnja.
„Ah, soenggoe bodo sekali akoe ini,“ kata poela ia: „mengapatah akoe moesti begitoe pendek pikiran ? Apa jang sekarang akoe alamken,
