— 70 —
Peng-tiong djadi terkedjoet, waktoe denger itoe perkatahan. jang njatalah ini orang pertapahan ada taoe dengen baek sagala keadahannja.
Sabelonnja ia sempet menjaoet, itoe Todjin dengen tertawa laloe berkata kombali:
„Ah, beroentoeng kaoe bisa sedar sabelonnja mendjadi kasep. Kaoe poenja keadahan ada tida bedah sabagi dirikoe pada tempo doeloe hari kerna akoe poen menampak nasib seperti kaoe baroe tersedar dan oendoerken diri.“
Tiauw Peng-tiong djadi goegoep dan memandang itoe Todjin dengen tida berkata-kata. Orang pertapahan itoe ada berbadan besar dan parasnja bersemoe mera, dengen ada mempoenjai djoega sedikit djenggot. Roepanja angker, hingga mengagoemken bagi siapa jang liat.
Dewa itoe berkata poela:
„Akoe ini di djaman Hantiauw poenja kapala perang jang bernama Tjiong Lie-koan, jang riwajatkoe doeloe hari, ada tida bedah seperti kaoe sekarang. Kaoe maoe soetjiken diri dan tida maoe tjampoer lagi perkara di doenia, itoelah baek sekali. Tapi lebi doeloe kaoe moesti djalanken bebrapa atoeran boeat orang-orang jang baroe masoek ka dalem ini kalangan, kamoedian baroelah bisa mendjadi dewa.“
„Sekarang marilah ikoet padakoe.“ kata poela Dewa Tjiong Lie-koan.
