— 144 —
sekarang toeroet djoega merasaken kesenangan.
Sahabisnja taon baroe, sigra djoega dateng boelan Tjhingbing.
Boeat samboet datengnja perajahan Tjhingbing, sadari djaoe-djaoe hari Tiauw-ien soeda sadiaken roepa-roepa barang kaperloean boeat plesir, dan menoeroet katanja, ini taon poenja Tjhingbing ia maoe bikin ongkos lebi rojal dari taon² jang soeda. Boleh djadi hendak membanggaken pada goeroenja, maka ia maoe kasi oendjoek itoe karojalan.
Biasanja plesiran itoe dibikin di Jantjoeki, jaitoe satoe tempat jang terdiri dari batoe dan bangoennja seperti boeroeng Jan. Itoe Jantjoeki berada di tenga-tenga kali, dan pada harian Tjhingbing, banjak sekali orang jang dateng ka itoe tempat aken djalan-djalan dan poewasken pemandangan mata.
Sigra djoega hari jang ditoenggoe itoe telah sampe. Dan itoe pagi dari harian Tjhinbing, boekan sedikit djoemblanja pendoedoek di kota Kiankong jang mengoendjoengi Jantjoeki, jaitoe orang-orang lelaki dan prampoean' toea moeda, ketjil besar, dari deradjat jang paling renda sampe jang hartawan dan berpangkat, semoea ada dateng bersenang-senang di itoe tempat dengen memake pakean baroe dan bagoes, jang satoe poenja pakean dan dandanan, tida kala bagoesnja dari jang laen.
