— 213 —
Gak Ho lantas kasi taoe, bahoewa ia soeda atoer
satoe itpoe boeat toeloeng kadoea Kiongdjin bersama Kongtjoe, maka dari sekarang, djanganlah
itoe tiga orang djadi terlaloe berkoeatir atawa soesa hati, kerna sabentar djoega bisa berlaloe dari
ini toetoepan.
Hoedjin mengoetjap banjak trima kasi.
Kerna kagirangan jang dateng begitoe mendadak, Hwa Hoedjin dan Kiongdjin djadi loepa menanja di mana Gak Ho itoe poenja tempat tinggal, dari siapa ia denger ini perkara dan laen-laen poela, hanja mengoetjap soekoer pada Toehan, jang telah dateng satoe penoeloeng boeat mendjaga kasoetjiannja.
Kamoedian Hoedjin itoe memandang pada Souw Siem dengen roepa heran, kerna tida taoe kenapa ini padri djoega toeroet dateng bersama-sama.
Souw Siem laloe tjeritaken, bagimana sasoenggoenja ada seperti Allah jang kirim Gak Ho ka mari boeat toeloeng ini doea njonja dan Kongtjoe, kerna niat boeat membriken ini pertoeloengan poen boekan telah dipikir lebi doeloe, hanja ada dengen kabetoelan.
Kamoedian ia tjiritaken dari bermoela, jaitoe bagimana tadi pada bebrapa djam jang laloe, Hwa Sien, boedjang toea dari ini orang bangsawan ada dateng ka gredja boeat minta ia toeloeng serep-serepin keadahannja ini doea Hoedjin, sebab
