— 287 —
roepanja itoe doea orang ?” tanja Tong Wie.
„Oh, tentoe sekali," djawabnja si tjantik.
Kamoedian ia laloe seboet dan petahken roepanja itoe doea orang, dan sasoedanja denger ini katerangan, ampat orang itoe djadi bertambatamba koeatir, kerna roepa jang dipetahken itoe poen, ada roepanja marika poenja Twako dan Hengte.
„Sekarang soeda tida bisa sala lagi, bahoewa orang jang ditangkep itoe, bener ada kita poenja Twako dan Hengte," kata Tong Wie; „maka sekarang, kita tida bisa tinggal diam boeat ini perkara, sabelonnja dapet katerangan lebi djaoe.”
„Tentoe sadja," djawab jang laen-laen itoe dengen soeara berbareng: „dan bagimana soedara poenja pikiran ?”
„Akoe pikir," kata Tong Wie: „baek begini: soedara bertiga baek lekas balik kombali ka praoe, sedeng akoe nanti pergi tjari laen-laen katerangan, dimana sekarang kita poenja Twako itoe berada.”
Lie Hoen bertiga memanggoet, tapi tida kaloearken satoe perkatahan.
Sasoedanja membajar harganja makanan jang didahar, ampat orang gaga itoe lantas kaloear dari waroeng arak, dan sasampenja di djalanan, Tong Wie oelangken poela perkatahannja jang baroesen dioetjapken dalem waroeng.
„Soedara bertiga toenggoe sadja sampe akoe balik kasi kabar,” kata poela Tong Wie: „sebab
