— 252 —
ini angkatan perang menjebrang kali, hingga maoe atawa tida, terpaksa itoe semoea balatentara moesti toeroet ini prenta. Dan sasampenja di tepi soengei terpaksa barisan itoe moesti brenti kombali, kerna itoe waktoe tida ada kaliatan satoe praoe.
Dengen menoenggang koeda Tjhiapekliong Kim Tjoe berdjalan moendar mandir memandang ka tenga soengei, tapi tida djoega kaliatan praoe. Di sitoe baroe ia tjeritaken, apa lantarannja ia soeroe barisan ini berangkat djalan malem-malem. Itoe gegodahan aneh ia rasaken sampe tiga kali, maka ia rasa tida boleh tinggal tidoer sadja. Kamoedian sambil angkat tjamboek ia berkata dengen soeara njaring:
„He, sakalian panglima dan balatentara! Di sebrang kita poenja angkatan perang ada ditoenggoe oleh kamenangan! Maka hajoelah kaoe semoea boentoetin akoe aken menjebrang di ini kali!“
Sahabisnja kata begitoe, ini radja jang gaga lantas menjeboer bersama-sama koedanja. Aer soengei ada sainggan peroet, maka itoe koeda Tjhiapekliong berdjalan teroes, sedeng penoenggangnja boenjiken tjamboek mendjeletar-djeleter. Semoea panglima dan soldadoe, jang liat radjanja ada berlakoe begitoe gaga, masing-masing ada toeroet itoe toeladan dan lantas menjeboer, jang tida lama kamoedian seantero pasoekan soeda ada di sebrang kali.
