— 36 —
boeat dipake oleh pendoedoek di sini sendiri. Djadi tegesnja, keadahan barang boeat pake atawa makan, sama sekali tida beroeboeng pada laen negri atawa tempat.
Orang-orang prampoean dan lelaki semoea ada radjin, maka sabegitoe lama pendoedoek jang tinggal toeroen menoeroen di ini tempat, tida pernah kakoerangan apa-apa. Djoega pengidoepan jang ditoentoet, kendati saderhana, tapi tjoekoep senang. Marika satoe pada laen ada akoer seperti soedara.
Betoel roemanja satoe pada laen ada berdjaoean dan mamentjil sendiri-sendiri, tapi kaloe kematian atawa mengawinken, tetangga-tetangganja pada dateng membantoe dan kerdja dengen girang zonder menerima oepahan.
Oewang ampir marika tida perloe.
Demikianlah ada katerangannja itoe orang.
„Itoelah satoe pengidoepan jang senang betoel,“ kata Lie Tjhoen sambil memandang di sakoeliling.
„Ja, seneng sekali,“ saoetnja itoe pendoedoek sambil bersenjoem: „kadang-kadang kaloe kita-orang poenja kerdjahan soeda moelai ringan, kaloe soeka kita-orang bikin pelantjongan boeat djalan-djalan tempo bebrapa hari.
„Begitoe?“
„Ja.“
