— 8 —
Dengen tjara begini, siapatah bisa pastiken, jang ia tida nanti silam dengen sa'antero toeboenja dari ini doenia?
Itoe anak, jang tadinja sanantiasa ada bergirang, dan jang bisa bikin iboenja djadi bersenjoem serta tertawa lantaran ia poenja tingka jang moengil, sekarang ada mendjadi lesoe sabagi adanja orang jang tida tahan bernapas lebi lama lagi, hingga dengen troesa sangsi orang boleh bilang, itoe poetra makota jang rebah di pembaringan seperti orang sakit, tida lebi ka'adahannja dari bajangan Graaf van Henegouwen, jang bisa sekali membri harepan besar pada iboenja.
Doktor-doktor tida bisa mendapet taoe apa jang mengganggoe penghidoepannja, atawa, maski poen ia taoe itoe, boleh ditentoeken sekali, marika tida nanti membri njata, hanja saban-saban mengasi sadja harepan baroe, jang boleh diboeat seperti penghiboer bagi sang iboe jang berdoeka.
Aken tetapi, kasian sekali permeisoeri kita, jang saban saban misti merasa koerang pertjaja atas benarnja itoe hiboeran, apabilah ia pergi sabentaran, dan salaloe baliknja, dapet meliat moeka djantoeng hatinja samingkin djadi poetjat.
