PERINGETAN DARI TEMPO DOELOE.
soedah bikin itoe perdjalanan ka Gang Tjendol di harian Sientjhia. Maka koetika itoe jongos sodorin itoe koempoelan soerat jang sabelah loearnja diboengkoes sama sapoetangan soetra dan di-iket rapih, Tham Tjay laloe samboet dengen sanget bernafsoe, dan taro itoe di atas dadanja dengen ditakep sama kadoea tangan seperti djoega ia memelok pada Sian Nio sendiri.
Tham Tjay mengarti, salagi kasehatannja masih terganggoe, ia tida nanti sanggoep membatja itoe antero soerat-soerat jang rada tebel dan pastilah amat pandjang boenjinja. Tapi toch hatinja soedah tida sabaran aken denger itoe kabar dan pesenan dari Sian Nio selekas-lekasnja bisa. Boeat soeroe iapoenja jongos atawa sopir, jang doea-doea mengarti soerat, aken toeloeng batjaken, ia merasa sanget kaberatan, kerna disitoe moeti ditoetoerken banjak resia jang ia tida soeka boedjang-boedjangnja dapet taoe. Achirnja ia dapet pikiran, djikaloe ada satoe orang jang pantes dan boleh dipertjaja boeat toeloeng batjaken itoe soerat, tida laen hanja Sioe Nio sendiri.
Begitoelah di itoe malem djoega ia perentah pada Oedin bawa auto ka moeloet Gang Tjendol aken minta dengen sanget dan djangan sampe loepoet soepaja Njonja Sioe Nio dan anak prampoeannja, Giok Nio , soeka dateng di roemah Tham Tjay di itoe malem djoega, kerna ada oeroesan penting sekalih boeat dibitjaraken. Itoe sopir dipesen boeat djangan poelang kaloe tida bersama itoe njonja, hanja moesti berdiam teroes di roemahnja Sioe Nio sampe ia loeloesken itoe ondangan.
Sedikit tempo sasoedah itoe sopir berangkat, Tham Tjay poenja dokter langganan dateng me-
88