PERINGETAN DARI TEMPO DOELOE.
nengokin dan kaliatan merasa poeas sama si sakit poenja ka'ada'an, jang ia bilang ada sampe baek dan seger, tjoemah diperingetken soepaja tinggal teroes di kamar boeat doea atawa tiga hari, dan salandjoetnja djangan banjak bergerak jang membikin tjape dirinja.
Komoedian Tham Tjay dahar boeboer dan koewa soep soepaja badannja djadi lebih koeat dan seger boeat terima kadatengannja iapoenja anak prampoean jang diketemoeken satjara tida disangka. Hatinja berdebar keras koetika satoe djam komoedian ia mendengar soeara dari ia poenja auto masoek ka dalem pekarangan, dan sabentar lagi kadengeran Salim, jang menjamboet di loear kamar, berkata: — „Masoek sadja, njonja, ‘ba-besar ada di kamar.“
„Ja. marih masoek ka sini, Sioe !” treak Tham Tjay dengen girang, dan laloe pinda doedoek melondjor di korsi males di samping pembaringan.
Sioe Nio dan Giok Nio bertindak masoek dengen sikep sangsi dan likat.
„Ah, Giok djoega toeroet!“ kata Tham Tjay sambil tersenjoem girang. „Itoelah memang jang akoe harep. Ini malem ada banjak soeal jang akoe hendak bitjaraken pada kaoe berdoea.”
„Apakah entjek soedah baek ?” Sioe Nio menanja.
„Djangan panggil entjek . . . . kaoe moesti panggil akoe papa, sebab akoe inilah ada soeami jang sah dari kaoe poenja mama,“ kata Tham Tjay. „Tapi sekarang, sabelonnja bitjara lebih djaoe, akoe maoe oendjoek doeloe kaoe poenja kamar — kaoe berdoea moesti menginep ini malem disini — temenin kaoe poenja papa dan engkong jang masih sakit, maski badannja sekarang soedah banjak segeran.“
89
