III.
Doeloe jang berbangkit dan terpeta dengen djelas koetika ia doedoek melajangken pikirannja di itoe maleman Sientjhia, memboeka djalan aken itoe orang toea meliwatken sa'at jang paling achir dari kahidoepannja di dalem kaberoentoengan, kapoeasan dan katentreman.
Ini lelakon, jang telah dimoeat dalem maandblad Moestika Romans penerbitan Februari 1940 dan salandjoetnja, sabagi „Tjerita Sientjhia,” boekan tjoemah boeat djelaskan apa jang Byron bajangken dalem sjairannja itoe, hanja hendak tjoba sadjiken satoe romans pertjintaan jang djalannja berbeda dari apa jang sering tertampak dalem kabanjakan tjerita. Sedeng biasanja orang loekisken sang pendekar moesti bergoelet keras sampe terkaboel angen-angen dan toedjoeannja jang medatengken kaberoentoengan dalem penghidoepannja di doenia, adalah disini orang nanti dapetken saorang toea jang bergoelet boeat bisa itjipin kombali kaberkahan jang telah lama termoesna, dan tjoba kenangken poelah kaberoentoengan dengen satoe kekasih jang telah meninggal ampir ampat-poeloeh taon lamanja.
Tapi ini loekisan boekan satoe fantasie. Djikaloe sa'ande orang bisa mengataoei apa jang ada tersemboeni dimana lapisan sabelah dalem dari hatinja kabanjakan kake kake dan nene nene jang kaliatan soedah tida soeka taro perhatian lagi pada kasenangan doenia, nistjaja nanti kadapetan beberapa soentingan boenga jang tinggal seger dan haroem selamanja – kenangan dari sa'at-sa'at jang sedep dari tempo jang telah liwat koetika marika hidoep beroentoeng dengen salah-satoe kekasih – itoe „Peringetan dari Tempo Doeloe.”
Tjitjoeroeg, 31-7-'41. -
K. T. H.
