PERINGETAN DARI TEMPO DOELOE.
hingga djikaloe tida ada ajah dan iboekoe ― koetika masih hidoep ― jang toeloeng rawat dan tanggoeng segala ongkos berobat, nistjaja soedah lama akoe beräda di lobang koeboer.
„Salaennja dari iapoenja kapelitan jang loear biasa, akoe poen dapet banjak rongrongan dari Lim Sam poenja tabeat tjoeriga dan tjemboeroean. Brangkalih lantaran inget akoe ini satoe prampoean jang telah ’bertjatjat,’ maka ia koeatir di satoe tempo akoe nanti berdjalan salah kombali, apalagi kerna paraskoe boleh dibilang tjantik, oesiakoe masih moeda dan tabeatkoe rada modern. Maka Lim Sam telah berdaja saberapa bisa boeat tindes akoe poenja soemanget dengen tida kasih akoe bergaoelan pada tetangga atawa kenalan biarpoen antara sasama prampoean, hanja siang dan malem moesti tinggal diroemah, dan tida boleh berdandan jang sedikit rapih, malah ia larang akoe saban hari bersisir, pake bedak dan sikat gigi, kerna itoe samoea ia anggep sabagi kagenitan.
„Lebih tjilaka lagi kerna ini perlakoean jang kedjem dan sawenang-wenang dari Lim Sam telah dibenerken oleh akoe poenja ajah dan iboe dan laen-laen familie, lantaran mengingat dirikoe soedah ’bertjatjat besar,’ hingga ada dengen sapantesnja djikaloe itoe soeami ambil atoeran keras goena melindoengin soepaja akoe tida terdjeroemoes boeat kadoea kalih. Iboekoe bilang, maski Lim Sam tabeatnja sakaker dan dan bengis, tapi ia ada saorang baek-baek jang radjin mentjari doeit, kalakoeannja di loearan tida bisa ditjelah, dan ia sendiri poen hidoep himat. ‘Kaoe poenja kaberoentoengan, Sian, nanti dateng kapan itoe anak-anak soedah besar dan bisa bales rawat dan hormat pada kaoe,’ kata iboekoe, jang pan-
101
