PERINGETAN DARI TEMPO DOELOE.
Salandjoetnja Tham Tjay menangis teroes, dengen seboet-seboet pada Sian Nio jang ia namaken „bidadarikoe”, „bintang dari kaberoentoengankoe” dan laen laen lagi. Pertjoba'annja Sioe Nio boeat memboedjoek dan menghiboer telah sia-sia, hingga itoe njonja djadi bingoeng dan koeatir. Achirnja ia pergi ka belakang, bangoenin pada jongos Salim dan sopir Oedin, jang lantes dateng ka dalem kamar.
„Apakah baba besar kapingin saja panggil dokter lagi?” menanja Salim.
„Tida, akoe maoe soeroe kaoe berdoea Oedin panggil toean notaris,” kata Tham Tjay.
„Toean notaris! . . . . boeat apa . . . . .soedah begini malem . . . . saja tida taoe roemahnja . . . .” kata Salim.
„Oedin taoe, sebab ia soedah beberapa kalih anter akoe ka sana, di Grootepostweg!” kata Tham Tjay.
„Tapi sekarang, 'ba-besar, soedah djam doeablas liwat! . . . .”
„Tida perdoeli! kaoe moesti gedor pintoenja dan bangoenin padanja. Bilang perloe sekalih ia moesti dateng sekarang djoega, ada oeroesan testament jang akoe maoe bikin di ini malem. — Lekas pergi, djangan ajal! — Boleh pake itoe auto!”
— „Tapi dokter bagimana?”
— „Akoe tida perloe dokter, akoe perloe notaris!”
Koetika itoe sopir dan jongos soedah berlaloe dan kadengeran soeara autonja kaloear dari pekarangan, kaliatan Tham Tjay djadi sabar. Ia serahken pada Sioe Nio sarentjeng koentji, dan minta ia toeloeng boeka lemari besi jang terletak di oedjoeng kamar, dan ambil dari dalemnja
104
