PERINGETAN DARI TEMPO DOELOE.
orang saksiken bagimana djeleknja perhoeboengan antara Tham Tjay dengen istri dan anak-anaknja koetika marika masih hidoep, lantaran tabeat, pikiran dan kasoeka'an jang berbeda amat djaoe satoe dari laen, hingga dengen istrinja jang lojaar dan soeka plesir ia hidoep seperti andjing sama koetjing, tida berentinja bertjektjokan dan saling menghina, sedeng perboeatan dari itoe doea poetra, jang tabeat dan prilakoenja dalem segala hal ada saroepa dengen marika poenja iboe, poen membikin Tham Tjay sering tida enak makan dan tida bisa tidoer. Maka dengen berdasar atas itoe pengalaman jang penoeh kagetiran, Tham Tjay ambil poetoesan boeat tida djeroemoesken diri ka dalem itoe matjem „naraka doenia” boeat kadoea kalihnja.
Hal banjak orang bisa hidoep beroentoeng dengen familienja, dan malah dapet banjak kagirangan, kapoeasan dan hiboeran dari istri dan anak tjoetjoenja, Tham Tjay tida perhatiken sama sekalih; kerna menoeroet iapoenja pendapetan dan pemandangan, jang didasarken atas kaoewangan meloeloe, adanja istri dan anak-anak, apalagi kaloe itoe familie berdjoemblah boear, selaloe memberi gandoelan jang memberatin tanggoengan. Djadinja dalem ini satoe hal Tham Tjay poenja tjara memikir ada bersama'an dengen anggepan Buddhist dan beberapa agama laen, jang pandang adanja istri dan anak, familie dan roemah tangga, mendjadi samatjem iketan jang mengganggoe manoesia poenja katentreman dan menghalangin boeat dapetken kabebasan. Tjoemah bedanja, saorang Bhikkhu tida maoe poenjaken familie dan roemah tangga lantaran hendak dapet kaseetjian, sedeng Tham Tjay poénja toedjoean hanja aken koempoel kaka ja'an.
16
