PERINGETAN DARI TEMPO DOELOE.
saorang boesoek, soepaja itoe gadis tetep tjinta padanja dan soeka djadi istrinja, dengen tida perdoeli apa laen orang bilang
Goena ini maksoed ia berbangkit, tarik tangannja Sian Nio jang lagi soesoetin aer mata, dan soeroe itoe gadis doedoek atas korsi di sabelahnja, dan berkata : —
„Dengerlah apa jang enko hendak bilang, Sian ! Tentang kasalahan dari kaoe poenja papa, akoe sedia boeat terima mendjadi korban dan masoek dalem boewi djikaloe perloe; tjoemah akoe minta kaoe djangan bikin ajahmoe djadi goesar, maloe dan sakit hati, dengen menjomel, membangkit dan seselin iapoenja perboeatan, jang saberapa boleh haroes didjaga soepaja tida ada satoe orang loear jang taoe. Malah kaoe sendiri poen haroes berpoera-poera tida taoe apa-apa, dan djangan sekalih tjerita apa jang akoe bilang sekarang. Akoe tida perdoeli di mata antero doenia dirikoe dipandang sabagi saorang boesoek, kaloe sadja di matanja Siotjia Ouw Sian Nio akoe tinggal bersih."
„Saja nanti bantah sasoeatoe orang jang memboesoekin namanja enko," kata Sian Nio sambil sesenggoekan.
„Tida perloe, boleh antepin sadja," memperingetken Tham Tjay dengen roepa soenggoe-soenggoe. „Kaloe moesti membantah, nistjaja saban hari kaoe bakal kena riboet sama samoea orang, malah boleh djadi djoega pada kaoe poenja papa dan mama, jang nanti toeroet memboesoekin padakoe."
„Papa dan mama tida ada begitoe rendah, enko Tjay," saoet Sian Nio. „Papa tida begitoe djahat boeat memboesoekin pada saorang jang dapet tjilaka dari lantaran kasalahannja."
39
