PERINGETAN DARI TEMPO DOELOE.
„Akoe taoe ajahmoe ada terkenal sabagi saorang baek dan djoedjoer," menerangken Tham Tjay. „Tapi djoestroe lantaran insjaf jang namanja soedah sampe haroem dan bersih, maka ini satoe kalih ia bisa berlakoe nekat aken singkirkan itoe noda jang mendjelekken. Maka boekan tida boleh djadi, aken bersihken dirinja dari ini oeroesan, ia nanti sengadja timpaliken segala kasalahan atas poendakkoe, dan malah karang segala matjem tjerita jang membikin akoe di pandang boesoek dan rendah, soepaja djikaloe ada omongan di loearan hal ia ada pake itoe oewang jang akoe titipken, tida saorang nanti maoe pertjaja. Dan boekan moestail kaloe ia larang kaoe berhoeboeng lagi padakoe soepaja kita poenja pengharepan boeat mendjadi soeami istri tida bisa diwoedjoetken."
„Ah, tida bisa djadi, djangan pikirin jang tida-tida, enko Tjay !" treak Sian Nio dengen soeara djengkel. „Papa saja boekan ada itoe orang jang bisa berlakoe kedjem dan palsoe begitoe roepa. Di dalem kesel dan bingoeng enko poenja pikiran mendjadi kaloet dan lantes menjangka sembarangan !"
„Akoe harep jang akoe poenja doega'an keliroe," memboedjoek Tham Tjay. „Tapi djikaloe sa'andenja kaoe poenja ajah ada omong apa-apa jang mendjelekin akoe, djangan kaoe taro pertjaja sabelon denger akoe poenja katerangan. Apakah kaoe maoe berdjandji itoe?"
—„Baek."
— „Soepaja djangan sampe ajahmoe terpaksa moesti mendjoesta dan poeter-poeter doedoeknja hal, paling baek kaoe berlakoe seperti tida soeka ambil perdoeli pada ini oeroesan, poera-poera tida taoe atawa tida denger satoe apa, dan djangan
40
