PERINGETAN DARI TEMPO DOELOE.
dan Sian Nio bersama beberapa penoempang laen jang dateng belakangan, naek dalem itoe trein dengen pake kartjis orang priboemi. Itoe slendang jang dipake koedoengin moekanja Sian Nio dan itoe setangan kepala jang mengiket sampe di deket alis, membikin iaorang tida dikenalin oleh conducteur. Sampe di Tjiandjoer iaorang tida toeroen, hanja Tham Tjay beli laen kartjis boeat teroes ka Bandoeng, dimana koetika sampe iaorang laloe mondok di satoe hotel jang moerah kapoenja'an saorang Indonesier.
Sasoedah ilang mengantoeknja dan tinggalken Sian Nio di itoe hotel, ia pergi ka Tjikoeda Patèuh, dimana ada tinggal iapoenja sobat baek jang beratsal dari Soekadingin dan sekarang ada boeka satoe waroeng jang loemajan djoega. Pada itoe sobat, Lay Hok, ia toetoerken teroes terang apa jang kadjadian dengen dirinja, dan minta diberi tempat berlindoeng boeat sedikit tempo sampe soedah bisa dapet pakerdja'an boeat hidoep sendiri.
Lay Hok jang moerah hati menjataken bersedia aken menoeloeng. Ia poen memang perloe sama saorang jang pande dan boleh diandelin boeat bantoe oeroes waroengnja jang senantiasa bertambah madjoe, Tham Tjay boleh bekerdja padanja dengen gadji f 30 saboelan dan ia oendjoekin satoe roemah kampoeng jang sewa'annja f 3,00 saboelan boeat ia tinggal bersama Sian Nio.
Begitoelah Tham Tjay soedah kasampean maksoednja boeat hidoep dari baroe lagi di laen negri bersama iapoenja kekasih. Itoe satoe taon jang diliwatken di Bandoeng membikin ia sanget beroentoeng, kerna dengen hidoep satjara himat, apalagi kerna di itoe zaman memang segala apa
55
