PERINGETAN DARI TEMPO DOELOE.
Biarpoen segala apa jang berhoeboeng dengen Sian Nio sekarang telah linjap dan termoesna, toch sedikit reroentoek jang masih katinggalan ― itoe gang, itoe kampoeng, itoe bekas roemah jang ditinggalin oleh itoe kekasih, itoe solokan ketjil di depan roemah, itoe poehoen-poehoen jang masih menoemboe ― sedikitnja moesti kasih apa-apa boeat bangkitken kombali itoe peringetan dari tempo doeloe.
Begitoelah itoe orang toea telah lajangken pikirannja, di itoe maleman Sientjhia, kapada penghidoepan dari ampatpoeloeh taon laloe jang terpeta dengen begitoe djelas hingga ia loepa dirinja soedah toea, djompo dan berpenjakitan ― tida inget pada penghidoepannja jang belakangan sabagi soedagar besar dan saorang hartawan, dan laen-laen lagi. Tham Tjay tinggal berdoedoek teroes dengen pikiran seger sampe kadengeran soeara berkroejoeknja ajam, perletoesan petasan samboet-menjamboet jang dibarengin dengen soeara muziek, gamelan dan tamboer, Barong-saij, satoe tanda pendoedoek Tionghoa di Soekadingin soedah rame bergerak boeat menjamboet kadatengannja taon baroe, Taon Naga, dengen hati goembirah dan penoeh harep-harepan baek. Dan Tham Tjay poen sekarang ada kandoeng harepan . . . . meliat kombali sisa-sisa dari kaberoentoengannja di tempo doeloe!
Sasoedah sang fadjar moelai oendjoek roepanja, dan kadengeran soeara dari iapoenja koki jang bitjara dan moendar-mandir di kamar makan aken bikin sedia soesoe dan sarapan pagi, baroelah Tham Tjay masoek ka kamarnja boeat tjoba tidoer, soepaja badannja seger kapan sabentar siang ia bikin itoe perdjalanan. Tapi dari sebab pikirannja bekerdja keras dan hatinja se-
71
