PERINGETAN DARI TEMPO DOELOE.
fantalon dari tricot tebel warna aboe-aboe, sama topi vilt poetih dengen band item dan spatoe item. Sasoedah isi sadjoemblah oewang ketjil dalem dompetnja — kerna di harian Sientjhia ada banjak pengemis — dan bawa satoe toengket kajoe asem dengen pentol perak, ia djalan dari pintoe samping menghampiri pada auto jang soedah tersedia di moeka garage, dan bilang pada iapoenja sopir : — „ Pergi ka moeka. Gang Tjendol, dan lantes toenggoe disitoe sampe akoe kombali."
„Apakah saja moesti toeroet djoega, 'ba besar?" menanja iapoenja jongos jang biasa mengoentit kaloe Tham Tjay pergi ka loear roemah aken menoeloeng kapan ia ada kaperloean apa-apa atawa dapet sakit dengen mendadak.
„Tida oesah, ini kalih akoe maoe djalan djalan sendirian," ia berkata.
Dalem tempo belon sapoeloeh minuut iapoenja auto soedah berenti di moeloet dari itoe gang jang ia maksoedken, dan salagi beräda di tengah perdjalanan, Tham Tjay tida berentinja menoleh ka kanan kiri boeat liat bangoennja itoe straat, jang sekarang berbeda djaoe dari apa jang ia kenal pada 40 taon laloe, kerna roemah-roemah lama banjak jang soedah dirombak dan diganti dengen pendirian baroe jang lebih bagoes dan keker. Sadari tetirah di Soekadingin Tham Tjay belon perna ka loear roemah boeat saksiken pemandangan, kerna kawarasannja jang selaloe terganggoe, dan peringetan tida enak jang ia alamken di tempo doeloe, membikin ia merasa soengkan boeat taro perhatian lag pada straat-straat di bagian sabelah dalem dari kampoeng Tionghoa.
Itoe moeloet Gang Tjendol masih sama djoega sempitnja seperti doeloe, tapi roemah-roemah papan bobrok di kanan dan kirinja dimana doeloe
73
